അമ്പലപ്പുഴ: മുത്തച്ഛന്റെ സഞ്ചയനകർമത്തിന്റെ ഭാഗമായി കടലിലിറങ്ങി കാണാതായ വിദ്യാർഥിക്കായി തെരച്ചിൽ ഊർജിതമാക്കി. പുറക്കാട് പഞ്ചായത്ത് പത്തൊൻപതാം വാർഡ് നടുവിലെ മഠത്തിൽ രാജേഷ്-റാണി ദമ്പതികളുടെ മകൻ 16 വയസുകാരൻ സൂര്യനെയാണ് കടലിൽ കാണാതായത്. ശനിയാഴ്ച വൈകിട്ട് 5.30 ഓടെ പുറക്കാട് കരൂരിലായിരുന്നു അപകടം.
തൊട്ടടുത്തുതന്നെ താമസിക്കുന്ന മുത്തച്ഛന്റെ മരണാനന്തര കർമം കഴിഞ്ഞ് ബന്ധുക്കളായ മറ്റ് മൂന്നു സുഹൃത്തുക്കളുമൊത്ത് കടലിൽ കുളിക്കാനിറങ്ങിയതായിരുന്നു.
വിവിധ വകുപ്പുകളുടെ നേതൃത്വത്തിൽ തിരച്ചിൽ ശക്തമായി നടക്കുന്നുണ്ടെന്നും ആവശ്യമെങ്കിൽ നേവിയുടെ സഹായം തേടുമെന്നും സ്ഥലം സന്ദർശിച്ച ജി. സുധാകരൻ എംഎൽഎ പറഞ്ഞു. എഡിഎം പ്രേംജി, തഹസീൽദാർ ലെറ്റിമോൾ, ബ്ലോക്ക് പ്രസിഡന്റ് എം. മനീഷ്, എ.ആർ. കണ്ണൻ, ഗോപകുമാർ, ജയശ്രീ എന്നിവരും സ്ഥലത്തെത്തിയിരുന്നു.